Bankaskattur
Það blasa við umfangsmikil verkefni í fjármálum ríkisins. Brúa þarf um 40 milljarða halli á fjárlögum næsta árs, ella munu vaxtagreiðslur sliga fjárhag ríkisins.
Ýmsar hugmyndir hafa komið upp hvernig hægt sé að taka á þessum vanda - margar góðar eins og að minnka yfirbyggingu innan stjórnarráðsins.
Ég hef lagt á það mikla áherslu að horfa beri til þess að skera niður í útgjöldum ríkissjóðs t.d. með sameiningu eða niðurlagningu stofnanna og ráðuneyta.
Ég er einnig andstæðingur frekari skattahækkana á heimilin og fyrirtækin, en ef horfa eigi til skattahækkana þá hef ég talað fyrir auðlindaskatti – þar sem notendur greiða skatt fyrir afnot af auðlindum lands og sjávar.
En ég vil leggja fram hugmynd að nýrri skattlagningu. Það er sérstakur tekjuskattur á fjármálastofnanir – „ bankaskattur“.
Árið 2009 var hagnaður Arion banka, Landsbanka og Íslandsbanka samtals 51 milljarður króna. 51 milljarður króna - og arðsemi eigin fjár allt að 30%. Fyrstu þrjá mánuði ársins var svo Landsbankinn 8 milljarða hagnað – eða rúmlega 90 milljónir á dag.
Þetta er á tímum þar sem stjórnvöld eiga í hatrammi baráttu við bankastofnanir að þær komi til móts við skuldara með frekari aðstoð við heimili í vanda. Nú horfum við frammá niðurskurð í þjónustu við aldraða, fatlaða, og skerðingu á velferðarbótum. Frá árinu 2003 höfum við Íslendingar einkavætt hagnað fjármálastofnanna en ríkisvætt tap þeirra. Ég vill leggja til að þessari þróun verði snúið við og lýsi mig fylgjandi innleiðingu bankaskatts á þær fjármálastofnanir sem sýna svona umtalsverðan hagnað.
Þær verða að leggja sitt af mörkum við endurreisnina – og hjálpa okkur að ná uppí fjárlagagatið.
Við erum komin að sársaukamörkum í niðurskurði, þá sérstaklega ef menn ætla að ríghalda í ráðherrastólana sína.
0 Athugasemdir