Fjárfesting í framtíð
Stöðugt rekstrarumhverfi, gott aðgengi að erlendum mörkuðum, fjármagn á lágum vöxtum og stuðningur við rannsóknir og þróun eru allt mikilvægar forsendur fyrir vöxt og viðgang fyrirtækja í tækni- , þjónustu og iðngreinum. Fyrirtæki í þessum geira mynda fjórðu stoðina í útflutningi okkar og eiga mestu vaxtarmöguleikana til verðmætasköpunar fyrir hagkerfið. Mikilvægt er að stjórnmálamenn átti sig á því með hvaða hætti þeir geta best stutt við bakið á þessum fyrirtækjum og gert þeim kleift að sækja fram og fjölga spennandi atvinnutækifærum.
Góð ávöxtun fjármagns
Fyrst ber að nefna stuðning við rannsóknir og þróun. Þar gegnir Tækniþróunarsjóður lykilhlutverki. Nýlegt áhrifamat á starfsemi sjóðsins sýnir að sjóðurinn skilar umtalsverðum árangri í uppbyggingu vaxtargreina atvinnulífsins og við eflingu útflutningsstarfsemi. Í 63% tilvika hafa styrkveitingar sjóðsins leitt af sér frumgerðir af vörum eða þjónustu. Í raun hafa fjárfestingar ríkisins í rannsóknir og þróun í gegnum sjóðinn skilað sér margfalt til baka. Greinarhöfundur kannaði sérstaklega stöðu tveggja fyrirtækja sem hafa fengið umtalsverðar styrkveitingar á undanförnum árum. Annað fyrirtækið hafði hlotið rúmlega 100 milljónir í styrki frá stofnun en skatttekjur ríkisins af starfsemi fyrirtækisins hafa frá stofnun numið um 400 milljónum, þar af á árinu 2011 um 100 milljónir króna. Fyrirtækið hefur þannig endurgreitt ríkinu stuðninginn ríflega þrisvar sinnum. Hitt fyrirtækið hefur fengið tæplega 100 milljónir í styrk en hefur á undanförnum árum greitt 200 milljónir í opinber gjöld vegna starfsemi sinnar. Bæði þessi fyrirtæki eru í örum vexti og því mun hið opinbera margfalda upphaflega fjárfestingu sína á næstu árum. Árlega greiða fyrirtækin upphaflegan styrk ríkisins í opinber gjöld.
Góður árangur Tækniþróunarsjóðs sýnir vel hvaða áherslur ríkið á að leggja í uppbyggingu atvinnulífsins. Það á ekki að „búa til störf“ eins og sumir stjórnmálamenn hafa kallað eftir heldur á það skapa forsendur fyrir atvinnulífið til að skapa störfin á eigin forsendum. Með styrkingu efnilegra verkefna í gegnum samkeppnissjóði næst að hvetja til nýsköpunar á réttum forsendum með stofnun nýrra fyrirtækja og eflingu þeirra sem eldri eru. Þannig gengur ríkisvaldið fram til að skapa störf sem lifa af eftir að aðkomu ríkisins sleppir. Með þeim hætti nýtum við mikil tækifæri til alþjóðlegrar nýsköpunar sem getur skilað áhugaverðum og vel launuðum störfum. Þannig eflum við fyrirtæki sem horfa frekar til framtíðar en fortíðar, fyrirtæki sem eiga í raun ótakmarkað vaxtarmöguleika en byggja tilvist sína ekki á umgengni um takmarkaðar auðlindir.
Mikilvægasta verkefnið
Þá geta stjórnmálamenn einnig unnið að bættu rekstrarumhverfi fyrir okkar efnilegustu fyrirtæki. Lykillinn að vexti fyrirtækja felst í stöðugu rekstrarumhverfi, opnun erlendra markaða og þolinmóðu ódýru fjármagni. Talsmenn fyrirtækja í tækni- , þjónustu og iðngreinum hafa þess vegna kallað eftir aðild að ESB og upptöku nýrrar myntar. Jafnaðarmenn eru eina stjórnmálaaflið sem tekur undir þessa beiðni. Hugverkaiðnaðurinn þ.e. tækni- , þjónustu og tæknigreinar verða hryggjarstykkið í atvinnulífi framtíðarinnar. Vilji Íslendingar eiga fyrirtæki sem skapa áhugaverð og vel launuð störf, þá verða þeir að hlúa að þessum fyrirtækjum. Aðild að ESB er mikilvægasta verkefnið á þeirri leið.
3 Athugasemdir
1.
2.
3.